Andhra Pradesh : కృష్ణా జలాలపై హక్కు కోల్పోతాం: ఏబీ వెంకటేశ్వరరావు హెచ్చరిక:మాజీ ఐపీఎస్ అధికారి ఏబీ వెంకటేశ్వరరావు పోలవరం, బనకచర్ల ప్రాజెక్టులపై కీలక వ్యాఖ్యలు చేశారు. ఈ ప్రాజెక్టుల వల్ల రాయలసీమలో కొత్తగా ఆయకట్టు పెరగకపోగా, ఆంధ్రప్రదేశ్ కృష్ణా జలాల్లో 200 టీఎంసీలపై తన హక్కును కోల్పోతుందని ఆయన అభిప్రాయపడ్డారు.
మాజీ ఐపీఎస్ అధికారి ఏబీ వెంకటేశ్వరరావు కీలక వ్యాఖ్యలు: పోలవరం – బనకచర్ల ప్రాజెక్టులతో రాయలసీమకు నష్టమేనా?
మాజీ ఐపీఎస్ అధికారి ఏబీ వెంకటేశ్వరరావు పోలవరం, బనకచర్ల ప్రాజెక్టులపై కీలక వ్యాఖ్యలు చేశారు. ఈ ప్రాజెక్టుల వల్ల రాయలసీమలో కొత్తగా ఆయకట్టు పెరగకపోగా, ఆంధ్రప్రదేశ్ కృష్ణా జలాల్లో 200 టీఎంసీలపై తన హక్కును కోల్పోతుందని ఆయన అభిప్రాయపడ్డారు. బనకచర్ల ప్రాజెక్టును ప్రతిష్టాత్మకంగా భావిస్తున్న ఏపీ ప్రభుత్వం తెలంగాణ ప్రభుత్వంతో చర్చించి ముందుకు వెళ్లాలని చూస్తున్న సమయంలోనే, ఈ ప్రాజెక్టును ఏపీ, తెలంగాణలోని వివిధ రాజకీయ పక్షాలు, మేధావులు వ్యతిరేకిస్తున్నారు.
ఈ ప్రాజెక్టును వ్యతిరేకిస్తూ నిన్న విజయవాడ ప్రెస్ క్లబ్లో ‘ఆలోచనాపరుల వేదిక’ ఆధ్వర్యంలో మీడియా సమావేశం జరిగింది. ఈ సమావేశంలో ఏబీ వెంకటేశ్వరరావు మాట్లాడుతూ, బనకచర్ల ప్రాజెక్టుతో ప్రకాశం జిల్లాలోని మెట్ట ప్రాంతాలు కూడా కరువులోనే ఉండిపోతాయని ఆందోళన వ్యక్తం చేశారు. పట్టిసీమ కాలువను పెద్దది చేసి 38 వేల క్యూసెక్కుల నీరు పంపినా, మరో సమాంతర కాలువ నిర్మించినా ప్రకాశం బ్యారేజీ వద్ద నది నిండుగా ప్రవహిస్తే విజయవాడకు వరద ముప్పు తప్పదని ఆయన హెచ్చరించారు.
18.5 కిలోమీటర్ల వెలిగొండ సొరంగాన్ని 30 ఏళ్లుగా పాలకులు పూర్తి చేయలేకపోయారని గుర్తు చేస్తూ, ఇప్పుడు నల్లమల కొండల్లోంచి మూడేళ్లలో 26 కిలోమీటర్ల సొరంగాన్ని ఎలా తవ్వగలరని ప్రభుత్వాన్ని ఆయన ప్రశ్నించారు. ప్రభుత్వం చెబుతున్న లెక్కల ప్రకారం 1,225 అడుగుల ఎత్తుకు 22 వేల క్యూసెక్కుల నీటిని ఎత్తిపోయాలని, బొల్లాపల్లి నుంచి బనకచర్లకు నీటిని ఎత్తిపోతల ద్వారా తరలించి తిరిగి దాన్ని వాగులు, పెన్నా ద్వారా సోమశిలకు తీసుకువెళ్లడం విద్యుత్, ఇతర ఖర్చులను వృధా చేయడమేనని ఆయన అభిప్రాయపడ్డారు.
ఈ ప్రాజెక్టు గత, ప్రస్తుత ప్రభుత్వాలకు అనుకూలమైన కాంట్రాక్టు సంస్థ ఆధ్వర్యంలోనే జరుగుతోందని, అందుకే వైసీపీ కూడా ప్రశ్నించడం లేదని ఏబీ వెంకటేశ్వరరావు ఆరోపించారు. లక్షల కోట్లు ఖర్చు చేస్తున్నప్పుడు ప్రజలు, మేధావులు, నిపుణులతో ప్రభుత్వం చర్చించాల్సిన అవసరం ఉందని ఆయన నొక్కి చెప్పారు.
Read also:HeavyRain : తెలంగాణకు భారీ వర్ష హెచ్చరిక: అల్పపీడనం ప్రభావం!
